|
Eglwys y bedyddwyr carmel baptist church pontlliw |
|
Myfyrdodau
(H.V. Watkins)
Gan y Parchg D. Islwyn Davies
|
|
Salm 103 (1-5)
Salm 103: 1 - 5 Mae’r adnod yn cwblhau catalog Dafydd o fanteision achubol; “ef sy’n fy nigoni â daioni dros fy holl ddyddiau i adnewyddu fy ieuenctid fel eryr.” Dyw’r gair digoni ddim yn air a glywir yn aml heddiw. Roedd grŵp “Y Rolling Stones” yn siarad ar ran eu cenhedlaeth gyfan wrth ganu, “I can’t get no satisfaction”. Pobl ydym sy wedi syrffedu gyda phleser, llawer ohono yn bechadurus, a theimlwn mor anfodlon. Mae gennym bopeth rŷn ni ei eisiau ac ond ychydig o’r hyn rŷn ni wir ei angen i’n gwneud yn wirioneddol hapus. Nid syrffed mae Duw yn ei gynnig ond boddhad; meddai Dafydd, “ef sy’n fy nigoni a daioni.” Cofiwn fod Dafydd yn cyfarch ei enaid; yr enaid mae Duw, a Duw yn unig, all ei fodloni. Mae Salm 37:4 yn dweud, “Ymhyfryda yn yr Arglwydd, a rhydd i ti ddeisyfiad dy galon.” Newyddion da yn wir i’n cenhedlaeth ni! Os ydych yn rhodio gyda Duw, fe fodlona eich enaid. Dyna ddywedodd Iesu wrth y wraig o Samaria wrth ffynnon Jacob, “ond pwy bynnag sy’n yfed o’r dŵr a roddaf fi iddo, ni bydd arno syched byth. Bydd y dŵr a roddaf iddo yn troi yn ffynnon o ddŵr o’i fewn, yn ffrydio i fywyd tragwyddol.” Ioan 4:14 “Syr,” meddai’r wraig wrtho, “rho’r dŵr hwn i mi.” Bydd Duw yn cynnig bywyd tragwyddol a bydd yn bodloni enaid pawb sy’n edifarhau a dod at Grist mewn ffydd. Nid yw hynny’n golygu na fydd Cristnogion byth yn profi caledi, tostrwydd, tlodi neu boen, na chwaith y bydd ein holl chwantau bydol yn cael eu bodloni. Fe ddywedodd Iesu, “os myn neb ddod ar fy ôl i, rhaid iddo ymwadu ag ef ei hun a chodi ei groes bob dydd a’m canlyn i.” Luc 9:23. Ond fe ddywedodd hefyd, “Yn wir rwy’n dweud wrthych nad oes neb a adawodd dŷ neu wraig neu frodyr neu rieni neu blant er mwyn teyrnas Dduw, na chaiff dderbyn yn yr amser hwn, ac yn yr oes sy’n dod, fywyd tragwyddol.” Luc 18: 29 - 33. “Fy enaid bendithia yr Arglwydd!” Yn olaf, dywed Dafydd y bydd ein hieuenctid yn cael ei adnewyddu fel eryr. Fe ddywedodd yr Apostol Paul rhywbeth tebyg ynglŷn ag adfywiad mewnol y Cristion. “Er ein bod yn allanol yn dadfeilio, yn fewnol fe’n hadnewyddir ddydd ar ôl dydd.” 2 Cor. 4:16 Mae’r eryr yn symbol o nerth a chryfder ac mae Duw yn rhoi nerth a chryfder i’r enaid sy’n ymddiried ynddo. Mae hyn yn cael ei gyflawni yn arbennig, felly, yn y bywyd ar ôl marwolaeth. Rwy’n meddwl am eiriau olaf pregethwr o’r 19eg, Dr. Edward Payson, yn marw ynghanol dioddefaint mawr. Fe ddywedodd, “Mi wn fod fy hapusrwydd ond yn dechrau. Fe fydd yn para am byth… Mae’n ymddangos fel pe bai fy enaid wedi darganfod pâr o adenydd newydd ac yn awyddus i’w defnyddio.” Gweler Eseia 40: 31 am brofiad tebyg. Gyda’r addewid bydd Duw yn adnewyddu ei ieuenctid fel eryr y mae Dafydd yn cwblhau y gadwyn o fendithion y dylai ei enaid ganmol yr Arglwydd amdanynt. Bydded i ninnau barhau i fendithio’r Arglwydd wrth i ni gofio gyda diolchgarwch ei holl fanteision achubol. “Fy enaid, bendithia’r Arglwydd, a phaid ag anghofio ei holl ddoniau.”
Vincent Watkins.
- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -
Gweler isod linc - 10 cyflwyniad Powerpoint llafar - tua ¼ awr yr un - o'r enw Pobl y Beibl ar rai o brif gymeriadau'r Beibl gan y Parchg Peter Harries Davies Dyma'r linc Cymraeg: https://www.youtube.com/watch?v=uKSdCodJNiA&t=1s
Below is a link to 10 Powerpoint presentations 15 mins long called “People of the Bible” by Revd Peter Harries Davies. English - https://www.youtube.com/watch?v=0dm5zHOFWW0&t=39s
- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -
Cliciwch yma i ddarllen hanes y Parchedig D Islwyn Davies gan ei ffrind Desmond Davies
Gan y Parchg Irfon Roberts |
|
Diolch i chi am ymweld â’r safle, a gobeithio y cewch yma rhywbeth i ennyn eich diddordeb yn yr Arglwydd Iesu, Gwaredwr y byd. Os fyddwch yn bwrw heibio cewch yma groeso cynnes iawn.
|
|
Cysylltwch â ni : negeseuon@carmelpontlliw.co.uk
Parchg. H. Vincent Watkins 01792 771650 |
|
GOMER - 'Gweinidogaeth Doniau' y Parchg D. Islwyn Davies |